Հաշվի առնելով մեր երկրում հայտարարված արտակարգ դրությունը և այն հանգամանքը, որ այդ ընթացքում առանց եկամուտների վերականգնման մեր հաճախորդները դժվարություններ կունենան արտոնյալ ժամանակահատվածից հետո վարկի մարում իրականացնել՝ IDBank-ը հայտարարում է հաճախորդներին աջակցման երկրորդ փուլի մասին։

Այն ենթադրում է`
1. Վարկային արձակուրդը երկարաձգվում է մինչև մայիսի 17-ը,
2. Վարկային արձակուրդին հաջորդող 3 ամսվա ընթացքում ֆիզիկական անձ հաճախորդները կարող են վճարել միայն տոկոսագումարները,
3. Նշված ժամանակաշրջանի ընթացքում չկատարված պարտավորությունները կբաշխվեն վարկի մարման հաջորդող ամբողջ ժամանակահատվածի վրա, ընդ որում այն վարկառուների համար, ում պարտավորությունների գծով առկա չէ անշարժ գույքով գրավային ապահովություն, երաշխավորություն կամ բացակայում է գրավային պայմանագրի վերակնքման անհրաժեշտությունը, վարկի մարման ժամկետը կերկարաձգվի ևս մեկ տարով։ Գրավով ապահովված վարկերի դեպքում վարկառուներն օգտվում են բոլոր վերոնշյալ արտոնություններից, բացի վարկի մարման ժամկետի ավտոմատ երկարաձգումից․ նրանց Բանկը կցուցաբերի անհատական մոտեցում։

Միաժամանակ տեղեկացնում ենք, որ մարտի 17-ից մայիսի 17-ը մայր գումարի և տոկոսագումարների, իսկ հաջորդող 3 ամիսների ընթացքում՝ մայր գումարի չվճարման դեպքում տույժ-տուգանքներ չեն կիրառվի, վարկը չի դասակարգվի, հաճախորդների վարկային պատմությունները չեն տուժի։

Վարկային մարումների նոր գրաֆիկը հաճախորդները կստանան էլ․ փոստով։
Վարկային արձակուրդից կարող են օգտվել միայն այն ֆիզիկական անձ հաճախորդները, ովքեր մարտի 17-ի դրությամբ չեն ունեցել ընթացիկ ժամկետանց պարտավորություններ։
Եթե հաճախորդը չի ցանկանում օգտվել վերոնշյալ արտոնություններից, ապա կարող է շարունակել կատարել վճարումները վարկի մարման ներկայիս ժամանակացույցով։

Բանկը արտոնություն է սահմանել նաև հյուրատնային, ռեստորանային, տուրիստական, զվարճանքի ոլորտներում գործող, ինչպես նաև ստեղծված իրավիճակով պայմանավորված էական բացասական հետևանքներ կրած իրավաբանական անձ հաճախորդների համար, որոնց կցուցաբերվի անհատական մոտեցում։

Իրավաբանական անձինք սահմանված արտոնություններից օգտվելու համար իրենց վարկի հերթական մարման օրից առնվազն 5 աշխատանքային օր առաջ պետք է առցանց դիմում ներկայացնեն Բանկ՝ անցնելով հետևյալ հղումով՝ https://www.idbank.am/content/contacts/, լրացնելով պահանջվող տվյալները, իսկ որպես թեմա ընտրելով «Վարկի մարման ժամկետի հետաձգում»։ Դիմումը ներկայացնելիս անհրաժեշտ է մանրամասն հիմնավորել ստեղծված իրավիճակը։

Դիմում կարող են ներկայացնել նաև այն հաճախորդները, ովքեր հաշվին գումար ունեն, սակայն ցանկանում են օգտվել վարկային արձակուրդից։ Դիմումն անհրաժեշտ է ներկայացնել մարման հերթական օրից առնվազն 3 աշխատանքային օր առաջ։

Հոգալով նաև այն հաճախորդների մասին, ովքեր ունեն բավարար եկամուտներ և հնարավորություն՝ IDBank-ը խորհուրդ է տալիս չխախտել վարկի մարման ժամկետները և վճարումները կատարել հեռահար տարբերակով՝ IDBanking.am առցանց հարթակով, Idram հավելվածով, ինչպես նաև IDBanking 24/7 գոտիների (ցանկին ծանոթացեք այստեղ) միջոցով և օգտվել նաև 200-ից ավելի բանկային և ոչ բանկային ծառայություններից։ Վճարեք առանց Ձեր առողջությունը վտանգելու։
Վարկային արձակուրդի երկրորդ փուլի վերաբերյալ հարցեր կամ անհամաձայնություն ունենալու դեպքում, խնդրում ենք դրանք ուղղել էլ․ փոստով՝ [email protected] հասցեով։
ԲԱՆԿԸ ՎԵՐԱՀՍԿՎՈՒՄ Է ՀՀ ԿԲ ԿՈՂՄԻՑ